Veurleezn op zolder

Meert nümen ze ook wel ies de lentemoand.

Dat is wel leuk bedacht, mer wat i-j deran? Lente wört et toch wel. Dat is altied al zo ewest. Of et now in de Middeleeuwn was, of toen Gellemuun Navalia hiette: lente word’ et altied in Meert. In Engelaand en in Spanje, in Moskou of in Stappers : Lente velt in meert. Ie kun de kelender derop geliek zettn.

Lente in meert is loochies, mer wat veur òns belangrieker is, is dat Meert dialektmoand is. Vuule minsen wieten dat niet en dat is jemmer. Een gebrek van de opvoedege van de olders, za’k mer zeagn. Zie em de kienders wel de neuze leern snoevn, leern loopn, leern spienaeze eetn, mer skrek niet, iel wat olders em un kienders gien dialekt leern proatn, ons eign Gellemuneger dialekt…

Iel wat Gerllemunegers em un kienders Ollaands eleert, dat denkn ze tenminste en now goan de kienders de maatschappij-e in met een tael die gien Gellemunegers en gien Nederlaands is. “Zeg, Bjorn, trek je wansen an!” of “Mirelle, aal j’ evvn een nummertje water? ” Erme kienders, mu-j zo de weerld in? Ouders, sappelt toch niet zo umme Ollaands an oen kienders te leern. Dat leern ze toch wel deur minsen, die wel goed Ollands kun. Ie kun et toch mer alfgebakkn.

Doorumme, dompelt oe mer ies goed weer in onvervalst Gellemunegers en kom luustern nor Veurleezn op zolder en neem oen kienders mee. Zie zulln et geweldig vienden um zo weer met eur eign cultuur in anraeknege te koom. Door oevn ze eur in ieder geval niet veur te skaamn.

Tussn twie-j eukies: De 25en meert is er in de Veldskure in Asselt ook de streektael-presentasie.
Deuran doen ook Gellemunegers mee van de Taelkrink.

Et stet angekondigt in de kraante. ’t Begint um 8 uur. Mer et wört druk…